ന്യുഡല്ഹി: ജെ.എന്.യുവില് 2016 ഫെബ്രുവരി ഒന്പതിന് മുന് വിദ്യാര്ത്ഥി യൂണിയന് പ്രസിഡന്റ് കനയ്യ കുമാറും, വിദ്യാര്ഥികളായ ഉമര് ഖാലിദും അനിര്ബന് ഭട്ടാചാര്യയും രാജ്യദ്രോഹ മുദ്രാവാക്യം വിളിച്ച കേസില് ഡല്ഹി പൊലീസ് കുറ്റപത്രം സമര്പ്പിച്ചു. കൂടാതെ സി പിഐ നേതാവ് ഡി രാജയുടെ മകൾ ഉൾപ്പെടെ പത്ത് പേര്ക്കെതിരെയാണ് കുറ്റപത്രം. പട്യാല കോടതിയില് സമര്പ്പിച്ച കുറ്റപത്രത്തില് 1200 പേജുകളുണ്ട്. രാജ്യദ്രോഹത്തിന് (IPC 124 A ), പുറമെ കലാപം ഉണ്ടാക്കല് (147), അനധികൃതമായി സംഘം ചേരല് (149) എന്നീ കുറ്റങ്ങളും ചുമത്തിയിട്ടുണ്ട്.
കനയ്യ കുമാര് ആണ് പ്രകടനത്തിനും, മുദ്രാവാക്യം വിളിക്കും നേതൃത്വം നല്കിയത് എന്ന് പൊലീസ് കുറ്റപത്രത്തില് ആരോപിച്ചിട്ടുണ്ട്. കനയ്യ കുമാറിന് പുറമെ സയ്യദ് ഉമര് ഖാലിദ്, അനിര്ബാന് ഭട്ടാചാര്യ എന്നിവര്ക്ക് എതിരെയും കുറ്റപത്രം സമര്പ്പിച്ചിട്ടുണ്ട്.കശ്മീരി സ്വദേശികള് ആയ അക്വിബ് ഹുസൈന്, മുജീബ് ഹുസ്സൈന്, മുനീബ് ഹുസൈന്, ഉമര് ഗുള്, റയീസ് റസൂല്, ബാഷാരത് അലി, ഖാലിദ് ബഷീര് ഭട്ട് എന്നിവരാണ് കേസിലെ മറ്റ് പ്രതികള്.കേസ് അവസാന ഘട്ടത്തിലാണെന്ന് ഡല്ഹി പൊലീസ് കമ്മീഷണര് അമൂല്യ പട്നായിക് അറിയിച്ചു.
അഫ്സല് ഗുരുവിനെ തൂക്കിലേറ്റിയതിനെതിരെ 2016 ഫെബ്രുവരി 9ന് കനയ്യ കുമാറിന്റെ നേതൃത്വത്തില് ജെഎന്യുവില് പ്രതിഷേധ മാര്ച്ച് സംഘടിപ്പിച്ചിരുന്നു. എന്നാല് ജെഎന്യുവില് നടന്ന പരിപാടിക്ക് അനുമതി വാങ്ങിയില്ലെന്ന് കണ്ടെത്തിയതിനെ തുടര്ന്ന് സംഘത്തെ പൊലീസ് തടഞ്ഞു. അതോടെ കനയ്യ കുമാര് മുന്നോട്ടു വന്ന് സുരക്ഷാ ഉദ്യേഗസ്ഥരോട് കയര്ക്കുകയും സംഘം ചേര്ന്ന് മുദ്രാവാക്യം വിളിക്കുകയുമായിരുന്നു.
Discussion about this post